Finalizado 2024 desvelóusenos finalmente a identidade da persoa gañadora da XXIII edición do Premio Avilés de Taramancos de Relato de Aventuras, que tivo desta volta un marcado sotaque local co recoñecemento a O trebón do norte, de Agustin Agra (Noia, 1966). O relato acadou o favor dun xurado conformado polo concelleiro José Pérez, Antonio Piñeiro, Ismael Ramos, Ana Romaní e Olga Lombaría, esta última con voz, pero sen voto. O premio consiste nunha estatúa conmemorativa, un premio económico de 3.000 euros e a publicación da obra pola editorial tamén noiesa Toxosoutos.
Agra, profesor e escritor, acumulou varios premios literarios, algúns deles de relato breve. O ano 2024 foi especialmente frutífero en materia de recoñecementos, xa que tamén gañou o XXVI Certame de Narración Curta Ánxel Fole, que anualmente organiza o Concello de Lugo xunto coa colaboración de Edicións Xerais de Galiza e que resolveu distinguir O livro das contrárias, de Agustín Agra.
Agustín Ángel Agra Barreiro é un escritor e biólogo de Noia. Comezou a escribir en 2003, publicando os seus primeiros textos nas revistas Alameda do Liceo de Noia e Casa da Gramática do IES Virxe do Mar de Noia, colaborando coa Asociación Cultural Barbantia e con La Voz de Bartantia. Ten publicado con notábel éxito obras infantís e xuvenís como Trampa de luz (2012, Xerais, Fóra de Xogo) ou Cor animal (2015, Kalandraka) e obras de narrativa tan destacadas como o libro de relatos Silencio, publicado en 2020.
