O deputado do Grupo Popular, Raúl Santamaría, criticou o comportamento do concelleiro socialista en Rianxo e patrón maior da Confraría de Rianxo, Miguel Ángel Iglesias, por, segundo afirmou, utilizar a súa posición para facer política contra a Xunta de Galicia e o Partido Popular.
Santamaría asegurou que Iglesias mantén un silencio sobre “a pésima política do Goberno de España no sector do mar”, aludindo a medidas como a rebaixa do IVE do peixe ou a falta de declaración de zona catastrófica para as rías galegas. Pola contra, acusouno de dirixir as súas críticas unicamente á Xunta.
O deputado popular tamén sinalou que a alta mortalidade de bivalvos na ría de Arousa, causada polas intensas precipitacións do outono de 2023, é a principal razón da actual baixada de produción nos bancos marisqueiros. “A cegueira política deste patrón maior impídelle recoñecer a excepcionalidade desta situación e o esforzo da Xunta para mellorar as condicións”, afirmou.
Medidas e axudas para o sector marisqueiro
Raúl Santamaría destacou o traballo da Consellería do Mar, que, segundo indicou, está en constante contacto co sector marisqueiro para abordar a recuperación dos bancos afectados. Neste marco, subliñou que, a través do Plan de Competitividade e Sostibilidade do Marisqueo, a Xunta xa mobilizou 70 dos 123 millóns de euros previstos.
Entre as últimas axudas concedidas ás confrarías da ría de Arousa, mencionou un investimento de 108.641 euros para proxectos de rexeneración dos bancos marisqueiros e outros 475.000 euros destinados á restauración da biodiversidade e dos ecosistemas mariños. Ademais, lembrou a orde de axudas publicada en xaneiro deste ano, que ascende a 2,2 millóns de euros para a mellora da xestión e conservación dos bancos marisqueiros.
Actuacións na ría de Arousa
O deputado destacou as intervencións realizadas pola Xunta en zonas de libre marisqueo, como O Bohído, Cabío e os Lombos do Ulla, a través de accións de rexeneración, acondicionamento de substrato, sementeiras e retirada de depredadores. Estas actuacións, asegurou, continuarán ao longo de 2025 para mellorar a produtividade e a sustentabilidade dos bancos marisqueiros.
Por último, Raúl Santamaría reafirmou o compromiso do Goberno galego co sector marisqueiro, malia, segundo el, as críticas e obstáculos que, asegura, poñen persoas como o patrón maior de Rianxo.
