O proxecto para crear o polígono industrial de Porto do Son deu novos pasos co comezo do ano. Contará co apoio da Consellería de Economía e Industria e da Fundación RIA, entidade impulsada polo arquitecto inglés afincado na nosa comarca David Chipperfield, centrada en modelos de arquitectura e urbanismo que priman a humanización dos espazos públicos e a recuperación das metodoloxías tradicionais de construción e de ordenación. Precisamente a fundación será a encargada de facer o prego técnico para iniciar despois o concurso de ideas.
O alcalde Luis Oujo en declaracións a Canal Barbanza confirmou que a consecución definitiva do parque empresarial é un dos grandes proxectos do seu Goberno, e que a intención é convertelo en realidade antes do remate do seu mandato. “Queremos facer un parque empresarial singular en Porto do Son que teña capacidade para achegar ás empresas parcelas a prezos non prohibitivos senón apetecíbeis, a nosa intención non é facer un complexo industrial duro senón un espazo integrado no territorio, neste punto o proxecto está bastante avanzado”. Respecto da superficie, a previsión é habilitar entre 80.000 e 90.000 metros cadrados de superficie. No que atinxe ao abastecemento de auga e o saneamento, serían precisas mínimas intervencións xa que se atopan preto as estruturas de abastecemento e máis a depuradora do Loreto.
