O Goberno municipal de Outes anunciou que lle vai solicitar ao SERGAS (Servizo Galego de Saúde) o mantemento da praza de matrona no Centro de Saúde da Serra nas mesmas condicións que na actualidade, “é dicir con dedicación exclusiva á veciñanza”. Segundo informou o alcalde, Manolo González, “a persoa que ocupa esta praza vén de xubilarse en datas recentes polo que na actualidade as usuarias deste servizo teñen que desprazarse a Noia”.
Ademais, explica que logo de contactar co persoal do Centro de Saúde, no Goberno local foron informados de que “non teñen información de se a praza vai ser cuberta e, en caso de selo, en que condicións”. Dende o Executivo local sinalan que “son moi numerosas as mulleres que utilizan este servizo en Outes, concello que conta cunha poboación de máis de 6.000 habitantes, polo que non sería de recibo non cubrir esta vacante ou facelo de xeito compartido con outro centro, como xa se fixo coa praza de pediatría”.
Dende o Goberno local amosan a súa preocupación polo que cualifican de “política de recortes seguida pola Xunta de Galicia” no referido ao persoal que presta os seus servizos no Centro de Saúde de Outes. Do mesmo xeito tamén manifestan a súa disconformidade co recorte de servizos que recentemente se vén de producir no PAC de Noia, no referido ao número de médicos que atenden en festivos e domingos, “e que vai redundar nun empeoramento da atención sanitaria da comarca”, explican.
