Ao abeiro do programa Ideas Transformadoras do GALP Costa Sostíbel este venres 17 de xaneiro celebrarase en Noia, no antigo Casino, unha xornada de traballo sobre innovación, sustentabilidade e competitividade pesqueira e marisqueira, organizada polo GALP de Fisterra e a ría de Muros-Noia e máis a xunta. No seu transcurso mostraranse as apostas que realizaron os promotores da nosa zona para desenvolver o territorio Costa Sostíbel. Será, en palabras da organización, “unha xornada para servir inspiración a outras empresas, institucións ou particulares para seguir avanzando cara o Horizonte 2027”.
O programa de actividades dará comezo ás 19.00 coa apertura das xornadas a cargo de Mariano Lago, presidente do GALP, e proseguirá coa proxección dun vídeo sobre o proxecto Ideas Transformadoras e un coloquio no que participarán os responsábeis do Restaurante O Salgadoiro, RBS Craft Fabricación de Embarcacións de Reciclaxe, Algamasa e Cabanas de Quilmas. Logo virá a entrega de distincións pola contribución á aplicación ELDP do GALP, seguida da presentación do jingle oficial do grupo de acción, da clausura da xornada (por parte do conselleiro do Mar) e dunha degustación de produtos mariñeiros.
