O pleno do Concello de Boiro aprobou na sesión celebrada este martes a participación no POS+ 2025 da Deputación da Coruña. A cantidade asignada ao Concello de Boiro é de 1.065.476,64 euros, que se van destinar na súa totalidade ao financiamento do gasto corrente.
O Goberno local explico que a principal novidade incorporada ás bases deste Plan Provincial de Cooperación ás Obras e Servizos de competencia municipal para o ano 2025 é que os concellos teñen a posibilidade de destinar o importe total ao financiamento de gastos correntes. “Decidimos apostar por esta fórmula de xeito que logo, con fondos propios, poidamos acometer outras obras sen ter que contar cos prazos e requisitos fixados pola Deputación”, afirmou o tenente de alcalde, Luís Ruiz.
As bases indican tamén que se deberá chegar unha solicitude vinculada ao Plan Complementario e que esta deberá acadar como mínimo o 25% da achega provincial de 2025. O Concello de Boiro incluíu para este Plan Complementario 2025 a Rede de saneamento e EDAR en Cures, unha actuación dun importe de 665.208,29 euros.
Cures non conta cunha rede integral de saneamento e con esta solución preténdese dotar deste servizo os lugares de Cures, Carboeiro, Amean e Aldea Grande. Proponse a instalación dunha planta de tratamento autónoma que minora de forma importante os custes de mantemento e consumo en comparación co envío da augas residuais ata a estación depuradora de Cabo de Cruz.
