O centro deportivo BeOne Rianxo, concesión do Concello, arrincou o ano coa súa nova campaña Propósito ONE unha iniciativa que convida á comunidade para facer do deporte o primeiro propósito do 2025 e, sobre todo, a cumprilo.
BeOne Rianxo lembra que conta con “instalacións de última xeración” deseñadas para “ofrecer unha experiencia deportiva completa”, por exemplo unha sala fitness equipada con zonas específicas para estiramentos, peso libre, cardio e adestramento funcional, ademais de maquinaria avanzada para un rendemento óptimo. A isto súmanse piscinas dedicadas tanto ao nado como a actividades de fitness acuático e salas polivalentes onde se desenvolven actividades coreográficas, de ton muscular e corpo-mente.
A campaña Propósito ONE quere facilitar a todos o acceso ao deporte. Por iso, durante este mes de xaneiro, a matrícula será completamente gratuíta e, “para aqueles que aínda estean indecisos”, BeOne ofrece “a posibilidade de probar as instalacións durante tres días de balde”, informou a concesionaria, engadindo que con este ano reforza a súa aposta por “un modelo inclusivo e familiar con abonos bonificados para familias, que permiten que tanto adultos como nenos poidan gozar da actividade física”. Así, os máis pequenos contan con área infantil de xogos, escolas de natación, campamentos e unha ampla oferta de cursos e actividades infantís.
Para unirse á campaña Propósito ONE, as persoas interesadas poden visitar a páxina web oficial habilitada para a promoción, onde poderán descargar o seu convite de balde e aproveitar todas as vantaxes desta promoción. Este xaneiro, a Piscina Municipal BeOne Rianxo anima a todos a dar o primeiro paso cara a “un ano máis activo e saudábel, porque este ano si, poñerse en forma será o primeiro propósito que se cumpra”, engaden.
