O obxectivo de Ramón Encisa captura a esencia pura da natureza e chega á Casa da Cultura Raquel Fernández Soler da Pobra do Caramiñal. A mostra Fotonatureza está integrada por unhas noventa instantáneas, ademais de algún material fotográfico antigo, que se poderán visitar durante todo o mes de febreiro.
Ramón une a súa paixón pola fotografía e a natureza para transmitir a beleza que nos rodea e concienciar, de maneira visual, sobre a importancia de coidar e protexer as nosas contornas. Encisa acadou o terceiro galardón nos concursos fotográficos de micoloxía correspondentes ao 2021 e 2024 impulsados polo Concello da Pobra do Caramiñal con motivo das xornadas micolóxicas.
No acto inaugural que terá lugar no venres, 7 de febreiro, ás 19.00 horas, intervirán o propio fotógrafo e o concelleiro do Medio Ambiente, Xosé Lois Piñeiro.
O acceso é libre ata completar a cabida da dita instalación municipal.
