Continúan morrendo persoas mentres se atopan en lista de espera para o recoñecemento da Dependencia, por parte da Xunta de Galicia. Algunhas familias humildes seguen a sufrir carencias e penurias, con membros discapacitados, mentres pasan os meses e non chegan as axudas á Dependencia. Tardan moito en poder gozar as axudas institucionais para o coidado do seu fillo, do seu pai, nai ou irmán, por culpa da burocracia administrativa da Xunta de Galicia.
Morren, antes de que lles cheguen as axudas demandadas e que realmente lle corresponden. Unha longa espera, a pesar da propaganda política, e continúan sentíndose indefensos e insultados pola Administración autonómica. A Xunta, presume da boa xestión e da axilidade nos tempos de atención e resolución pero a realidade demostra todo o contrario.
Por outra banda, segundo algúns expertos do Terceiro Sector e profesionais sobre Política Social, tamén critican o pouco interese en tramitar as rendas activas de inserción a favor da prestación do Ingreso Mínimo Vital, que depende do Goberno do Estado, ao obxecto de evitar o correspondente custo económico para as arcas autonómicas. Cando medra o número de familias vulnerábeis ou pobres, en Galicia, a Xunta dedícase a recortar servizos sociais.
A Dependencia e as axudas e prestacións sociais son piares fundamentais do Estado de Benestar e a responsabilidade no seu cumprimento é das Administracións Públicas. Para iso hai que crer no público e algo menos na iniciativa privada que unicamente beneficia a uns poucos, xeralmente os máis privilexiados.
