A faciana máis satírica, irónica e crítica de Castelao toma protagonismo na exposición “Os homes, por Castelao”, que permanecerá aberta ao público no auditorio de Rianxo ata o vindeiro 8 de febreiro. A mostra permite unha aproximación ao legado social e artístico do rianxeiro a través de preto de 70 pranchas de cinc orixinais, empregadas para imprimir os debuxos que Castelao publicou no xornal Galicia de Vigo en 1925, onde retratou a figura humana cunha fonda carga de denuncia social.
A chegada desta exposición á vila natal do autor foi posible grazas á colaboración entre o Museo de Artes do Gravado á Estampa Dixital e a xenerosidade do coleccionista Roberto Taboada, propietario das obras exhibidas. Durante o acto inaugural, celebrado na noite do venres, tanto o alcalde de Rianxo, Julián Bustelo, como o director do museo, Xoán Pastor Rodríguez, expresaron o seu agradecemento a Taboada por facilitar a celebración desta mostra.
A exposición ofrece unha oportunidade única para mergullarse na obra dun Castelao que, coa súa inxente creatividade, utilizou o humor e a sátira como ferramentas de análise e denuncia social, reflectindo as múltiples arestas dun dos grandes referentes da cultura galega.
