Este domingo 15 de decembro vaise celebrar en Boiro, no Campo de Fútbol de Vista Alegre, un encontro solidario de fútbol entre representantes do Clero e a Garda Civil, destinado a recadar fondos en beneficio de Cáritas. Dará comezo ás 17.00 horas.
Os detalles do partido foron dados a coñecer os días pasados polo alcalde de Boiro, José Ramón Romero, o párroco de Boiro, Juan Bermúdez, e o subtenente da Guardia Civil, José Antonio Fernández.
Segundo explicaron, a actividade vai consistir nun partido de fútbol solidario, “unha iniciativa que xa se desenvolveu noutros municipios e que resultou moi proveitosa e que queremos retomar aquí en Boiro nestas datas previas ao Nadal para axudar a aquelas persoas máis vulnerábeis”, afirmou Juan Bermúdez.
“Dende a Garda Civil de Boiro estamos moi contentos de poder participar neste encontro xunto con persoal doutras unidades e poder facer a máxima recadación para unha boa causa”, recoñeceu José Antonio Fernández.
As entradas terán un prezo de 3 euros anticipada e 5 euros na billeteira e todos os beneficio irán destinados a Cáritas. O alcalde de Boiro, José Ramón Romero, animou a toda a veciñanza a colaborar con esta iniciativa “que ten unha finalidade solidaria, que é contribuír á importante labor que Cáritas, en colaboración cos Servizos Sociais e con outras entidades do municipio, realiza para axudar ás familias máis vulnerables nunha época tan significativa como é o Nadal”.
