O futuro de Galicia está condicionado. Es as condicións dese futuro incerto ten nomes moi concretos que milleiros de galegos recitan de memória: eólica mariña, eólica terrestre, mina de Touro, Pasteira de Palas de Rei, mina de litio (posible) en Beariz… e todas elas cun futuro certo: prexudican máis ou menos, pero prexudican a Galicia e aos galegos. A proba está na resposta que unha multitude de cidadáns desta terra deron onte, domingo, á convocatoria dunha manifestación en contra da autorización á instalación en Palas de Rei dunha macrocelulosa propiedade dunha multinacional portuguesa que os portugueses non queren no seu territorio e que a Xunta de Galicia contempla como de interese económico e social para esta comunidade autónoma.
Por que tal desencontro, que leva a algún medio de comunicación a proclamar o mesmo como consecuencia da desinformación da cidadanía e que publica como editorial de bandeira?. Hai connivencia entre a empresa, a Xunta e o citado medio para que Galicia acubille a merda que a máis elemental conciencia ecolóxica e de defensa do seu recomenda o sentido común?. É postureo dicir “non” a Altri en Galicia cando, antes xa de agora, Altri obtivo un non rotundo á súa proposta de se afincar en territorio luso?. Que elementos inflúen agora no apoio decidido da Xunta de Galicia a ese proxecto malia saber do rexeitamento a este dun pobo que ten o dereito a decidir sobre o si e o non do seu presente e o futuro de seu?.
“Altri, non!” non pode entenderse coma unha ladaíña circunstancialmente recitada por partidos políticos contrarios ao que goberna en Galicia: hai ducias de organizacións que asumen o que ese berro significa e centos, milleiros, de galegos de dentro e de fóra que, mantendo firme o pulso no leme do “Nunca máis”, tamén afondan no sentir común do non querer o que emporca, o que dana porque prexudica, o que so beneficia a intereses alleos aos dos galegos.
Altri é unha fábrica de fibras téxtis cuxa produción afectaría negativamente aos sectores pesqueiro, marisqueiro, agrogandeiro e turístico cunha moi importante perda de postos de traballo no caso de se instalar en Palas. Moitos máis dos que a pasteira pode ofrecer a Galicia.
Que a protesta teña reberetes políticos é consustancial ás circunstancias derivadas dos efectos desa instalación apoiada dende o goberno autonómico que non explica que vantaxes aporta Altri a Galicia, nen asume o dano que Altri causaría á comarca da Ulloa, á ría de Arousa… Que a Xunta ten lexitimidade para lle outorgar a Altri licenza de instalación non se pode dubidar. Outra cousa é que dispoña de razoamentos ou argumentos dabondo para facer que os galegos entendamos os motivos polos que tal licenza se lle concede a unha empresa megacontaminante.
Hai motivos para asumir que, a de onte, domingo, foi unha marea de dignidade. Foron galegos na defensa do seu, do de todos. E cómpre entendelo. E mesmo asumilo.
