Este venres 20 de decembro celebrouse a renovación dos órganos de responsabilidade do BNG para a contorna de Muros e Noia, que comprende os concellos de Porto do Son, Lousame, Noia, Muros, Outes e Mazaricos.
Nunha asemblea moi concorrida foi reelixida por unanimidade, como responsábel comarcal, a deputada provincial e concelleira no Goberno de Outes, Soledad Agra Tuñas, que xa levaba ocupando o cargo desde o 2022.
Ocupará o posto de viceresponsábel Laura Eiras Rivadeneria, concelleira no Goberno de Muros. As dúas pasarán a formar parte tamén do Consello Nacional do BNG, máximo órgano de representación política da organización nacionalista.
O consello comarcal entrante estará formado polo portavoz de Noia, Ricardo Suárez, a alcaldesa de Muros, María Lago e o portavoz de Lousame, Anxo Moledo; ademais dos responsábeis locais de cada un dos municipios e nova militancia que nunca formara parte antes deste órgano de dirección e coordinación.
En palabras de Soledad Agra “dámoslle paso á nova militancia para fortalecer o noso proxecto, porque o BNG é unha organización política que toma decisións asembleariamente, a participación de cada unha das persoas que formamos parte dela é a que decide as nosas liñas políticas. No BNG caben todas as persoas que queiran o mellor para Galiza, a súa cultura, lingua e territorio, as nosas portas están abertas sempre para quen queira sumarse”.
A nova viceresponsábel, Laura Eiras, que nunca formara parte deste órgano, destaca “ a enorme responsabilidade que supón e o noso decidido compromiso a acompañar o intenso traballo social e permanente coa veciñanza para dar resposta ás súas problemáticas, porque no BNG estamos a pé de rúa aínda que esteamos nas institucións, somos pobo e traballamos para o pobo”.
COMPOSIÓN DO NOVO CONSELLO COMARCAL DE MUROS-NOIA
- Soledad Agra Tuñas
- Laura Eiras Ribadeneira
- Agapito Romero Barreiro
- Agustina Cortés Romero
- Mari Carmen Ínsua Varela
- David Barrio Alonso
- José Luís Obelleiro Somoza
- María Lago Lestón
- Vanessa Pena Santos
- Ricardo Suárez García
- Laura Pérez Sabigueiro
- Anxo Moledo Carreño
