O Concello de Porto do Son rematou recentemente as obras do peche perimetral da parcela do Centro de Día do municipio, co obxectivo de “garantir a seguridade das persoas usuarias”. A actuación, financiada a través dun convenio de colaboración co Consorcio Galego de Servizos de Igualdade e Benestar, contou cunha achega de 49.701,23 euros, establecendo un peche perimetral do centro con portais de acceso na entrada principal e laterais.
O alcalde de Porto do Son, Luis Oujo, destacou que “esta mellora lévase a cabo co fin de optimizar estas instalación que ofrecen unha gran atención ás persoas maiores da nosa vila”. O rexedor engadiu que “melloramos este centro que ofrece unha alternativa de convivencia e que mantén ás persoas maiores dentro da súa propia contorna, proporcionándolles unha atención integral adecuada ás súas necesidades”
Oujo agradeceu tamén “ao Consorcio Galego de Igualdade e Benestar pola súa constante disposición e por financiar esta actuación que é unha mostra máis do compromiso deste Goberno local coas persoas maiores da nosa vila”.
