Desta vez os traballadores de banca non se van ver afectados -como acontecera nos anos 60-70 do século pasado- polos cambios nos sistemas de funcionamento debidos á modificación da tecnoloxía derivada da aplicación ás contas de clientes de algo hoxe en día tan manido como son as computadoras. Ese cambio da máquina de escribir pola computadora significou para a banca a oportunidade de aplicar unha “limpa” nas nóminas de empregados que reduciu estas á mínima expresión.
O uso do diñeiro de plástico -tarxeta de crédito ou débito- tamén carrexou consecuencias poucos gratas para os traballadores, mais en repercusións moito menos devastadoras que as que acadara o abandono da máquina de escribir.
Viñeron posteriormente outros cambios que, derivados da escaseza de persoal nas entidades bancarias e o uso das mencionadas tarxetas de plástico, provocaron a aplicación de medidas que afectaron -e afectan- especialmente á clientela que tivemos a experiencia de que se nos aplicara un horario reducido para sermos atendidos por caixa.
Na actualidade son moitos os usuarios do teléfono móbil que empregan este como vía de aboamento substitutiva das xa mencionadas tarxetas de plástico. Un simple “disparo” do móbil basta para que o banco dea a súa conformidade (ou non) á operación polo usuario ordenada.
Son avances que non sempre se reciben con gusto. Pero a entrada en acción dunha centella chamada Bizum chama, cando menos, a atención: España respira a través dos bancos e últimamente está a facelo mediante ese servizo bancario.
Ven ser o tal Bizum un servizo de pagos móbeis que xurdiu en España vai para nove anos. Permite o envío de diñeiro entre os usuarios das entidades bancarias titulares de contas, especialmente entre familiares e amigos, mais tamén en comercios on line e mesmo en doazóns a determinadas ONG.
Dito doutro xeito: Bizum é unha maneira de facer transferencias de forma simplificada a respecto das transferencias bancarias ao utilizar o número de teléfono como identificador. Un método de pagamento inmediato e de balde realizado a través de teléfono móbil, sen comisións, incluso no caso de se enviar a outra entidade bancaria.
Para se dar de alta en Bizum debe facerse a través do portal ou aplicación móbil do teu banco nunha opción consignada a “enviar” ou “recibir” diñeiro con Bizum ou semellante. Feito esto,
e dependendo do teu banco, poderás mandar ou recibir diñeiro coa aplicación oficial do teu banco ou tamén a través, en moitos casos, da web.
De non ter descargada a aplicación ou non coñecer as túas claves de acceso, só tes que buscar o nome do teu banco na tenda de aplicacións do teu móbil e seguir o proceso de alta. Sendo como é de sinxelo acceder á banca on line é que os bancos cada vez implementan máis medidas de seguranza, polo que a banca é cada vez tanto ou máis segura que usar unha tarxeta de creto tradicional.
Para poder transferir diñeiro a outra persoa, deberás coñecer primeiro o seu número de teléfono móbil. O diñeiro deposítase e cóbrase directamente nas contas bancarias. De aquí que non resulte necesario dispor dun saldo aparte en Bizum, senón que este fai de intermediario entre as contas bancarias para simplificar o proceso.
Aínda que os usuarios particulares poden utilizar Bizum sen problemas, non poden facer pagamentos de menos de 0,5 euros nin de máis de 2.000 por operación. Tampouco está permitido recibir nunha conta máis de 2.000 euros nun mesmo día, así como se limita o número de operacións mensuais recibidas ou emitidas durante un mes a un total de 60 conxuntamente.
