A cerimonia, celebrada na Igrexa de Santiago, reafirmou a relevancia histórica, cultural e espiritual de Padrón no contexto do Camiño de Santiago. A cerimonia concluíu cunha misa solemne oficiada por Monseñor Francisco Froján Madero, membro da Secretaría de Estado do Vaticano
O Concello de Padrón acolleu hoxe a conmemoración da Traslatio, un dos episodios máis emblemáticos da tradición xacobea que rememora a chegada dos restos do Apóstolo Santiago ao antigo porto de Iria-Flavia hai máis de dous mil anos. A cerimonia, celebrada na Igrexa de Santiago, reuniu a autoridades, representantes de asociacións e colectivos locais, así como a numerosos veciños e veciñas nun acto que reafirma a relevancia histórica, cultural e espiritual de Padrón no contexto do Camiño de Santiago.
O acto contou coa presenza do alcalde Anxo Arca e dos membros da corporación municipal xunto a outras destacadas autoridades como José Manuel Merelles Remy, director da Axencia de Turismo en representación da Xunta de Galicia; Manuel López Vázquez, presidente da AGACS; Angel Trabada, da Asociación Amigos del Camino de Santiago en Lugo; representantes da Fundación Cela e da Fundación Ruta Xacobea Arousa Ulla; e outros membros do tecido asociativo e empresarial de Padrón. Ademais, asistiron peregrinos de honra como José Manuel Garrido Rivero, que destacaron o valor espiritual e histórico desta celebración.
Durante a ofrenda institucional, o alcalde Anxo Arca destacou que “Padrón eríxese como berce da tradición xacobea, recoñecido e visitado cada ano por milleiros de peregrinos e peregrinas que reciben a hospitalidade da nosa vila”. Esta ara romana, o Pedrón, símbolo patrimonial e espiritual, “vincula para sempre a nosa vila coa figura do Apóstolo”.
Ademais, o rexedor fixo un chamamento á solidariedade e á reflexión ante os retos sociais e humanitarios actuais como a crise humanitaria en Palestina: “No día de hoxe, pídolle ao Apóstolo que a intransixencia relixiosa e política non se impoña á liberdade; que por riba das ideoloxías e os intereses particulares os gobernantes saiban dialogar e chegar a acordos para aumentar o benestar da cidadanía”.
Tamén tivo palabras de recoñecemento pola resposta solidaria ante a traxedia acontecida en Valencia, ansiando “que nunca decaia o noso espírito solidario, amplamente evidenciado como resposta á traxedia da DINA no Levante”, así como “que poidamos acadar o fin da violencia machista e atopemos as fórmulas para dignificar aos colectivos máis desfavorecidos; que contemos todas e todos coas mesmas oportunidades,
independentemente da nosa orixe e condición; que saibamos coidar dos nosos maiores, agradecéndolles sempre a súa axuda e o seu traballo”.
“O Goberno e a Corporación Municipal de Padrón, coa axuda de Santiago, seguirá traballando para que, máis pronto que tarde, estes anhelos se convertan en realidades”, prometeu o alcalde Anxo Arca.
A cerimonia concluíu cunha misa solemne oficiada por Monseñor Francisco Froján Madero, membro da Secretaría de Estado do Vaticano, acompañada pola Coral Polifónica Padronesa e a actuación musical do Cuarteto Novecento.
Padrón consolídase con este evento como un referente esencial na tradición xacobea e reafirma o seu compromiso coa preservación e promoción do seu legado cultural e espiritual.
