Segundo o Ministerio de Agricultura, Pesca e Alimentación, España acadou no recente Consello de Ministros da UE bos resultados no Atlántico e Mediterráneo, de xeito que asegura a viabilidade dos 570 barcos que faenan no Mediterráneo e, no Atlántico, tamén “bos resultados”: cóbrense as expectativas, dixo Planas, en base á obtención de “boas cotas” en especies de “grande interese nos mercados e de alto valor comercial que permitan a estabilidade da actividade pesqueira”.
O Plan para o Atlántico -que é o que lle interesa especialmente a Galicia- aporta cifras “importantes” en especies coma o peixe sapo, xurelo e cigala, se ben non se especificaron as cantidades.
O ministro fala de “positivismo” nas negociacións da UE con Noruega e Reino Unido.
No Golfo de Cádiz mantense a cota de 32 toneladas de cigala. (Os barcos poderían rebordar con semellante cantidade).
Mantense a cota de 388 toneladas nas tres zonas de pesca de abadexo, o que para o ministro é “unha excelente nova” (menos mal que non incrementa a cota porque, do contrario, sería un desbarre).
Na pescada sur “consolídanse” as 10.953 toneladas que se viñan pescando. Consolidar o que xa había é positivo, aínda que non se incremente nada. Polo tanto, estabilidade para a frota arrastreira: non se perde. pero tampouco gañas. Non se consola quen non quer!.
Hai incrementos, si: no rapante (meiga), 732 toneladas; no peixe sapo sur, 625 toneladas; e en cigalas, pasamos de 12,4 a 25 toneladas (o nunca visto!). En bacallao ártico, España gaña 84 toneladas (menos é nada). E mantemos a cota de 106 toneladas de gallineta ártica. Mais o mecanismo de intercambio de posibilidades de pesca entre os Estados membros pode permitir que España se beneficie de parte desas cotas accesorias. Pode. E tamén se pode recuperar a cota de xurelo no acordo de pesca entre a Comunidade Europea e o Reino Unido nun 5% (máis de 10.000 toneladas) feito que leva ao ministro Planas a se sentir “moi satisfeito” porque “estas cantidades suporìan un importante alivio para as frotas do Cantábrico Noroeste, especialmente cerco, arrastre e gransoleira. Suben tamén as cotas de peixe sapo e ollomol, e a frota palangreira galega poderá beneficiarse do incremento de 572 toneladas que lle corresponden a España de peixe espada do Norte.
Son datos que emanan do Ministerio de Pesca español.
