O Concello de Muros presentou este martes 3 de decembro un novo recurso para favorecer o tratamento sustentábel de refugallos: un Punto Limpo Móbil que permitirá reforzar o servizo itinerante de recollida de residuos xa existente. Esta adquisición para a área municipal de Medio Ambiente financiouse con fondos Next Generation da UE.
O vehículo co Punto Limpo Móbil é un remolque eléctrico 100% e con certificado de 0 emisións.
“Traballamos a diario por un Muros sostíbel, un obxectivo para o que é necesario reciclar de forma correcta”, explicou a alcaldesa, María Lago, na presentación, engadindo que “o servizo percorrerá todo o concello” facilitando a veciñanza o correcto tratamento dos aveños que xa non precisen ou que xa non estean operativos.
Ademais, pode ser utilizado de forma independente e, polo seu tamaño reducido, pode acceder a zonas e rúas estreitas do concello.
Este colector itinerante permite a recollida de: pequenos electrodomésticos, fluorescentes, pilas e baterías, teléfonos móbiles e material informático, CDs e DVDs, radiografías, ferramentas electrónicas e utensilios de metal; envases de pintura, disolventes e aerosois; tintas e tóner de impresoras, produtos fitosanitarios e pequenos xoguetes e cápsulas de café de plástico ou aluminio. O servizo non inclúe a recollida de voluminosos.
