O Auditorio do Centro Cultural de Muros colleu esta tarde a I Gala do Deporte do Concello de Muros, un acto emotivo e festivo ás portas do Nadal para recoñecer o traballo de clubs, deportistas e persoas vencelladas ao deporte local.
“O deporte muradán é envexa en toda a comarca, desde as categorías base que manteñen o espírito de equipo e promoven un estilo de vida saudable, ata a elite deportiva en competicións a nivel europeo ou mundial”, asegurou na súa intervención a alcaldesa de Muros, María Lago.
“Tiñamos moita ilusión posta neste evento e esperamos que perdure no tempo despois do éxito desta tarde”, apuntou pola súa parte o concelleiro de
Deportes, Damián Torea, que agradeceu “o esforzo diario dos clubs e deportistas, e o traballo dos técnicos que fixeron posible esta gala”.
O xurado elixiu mellor deportista feminina do ano a Soraya Hermida Piñeiro (pesca submarina) e o mellor deportista masculino é Adrián Fernández Lago.
A mellor promesa feminina é Daniela Rama Figueiras (atletismo/duatlón/triatlón) e a mellor promesa masculina Pablo Lestón Uhía (atletismo/duatlón/triatlon). O mellor club deportivo é a SCRD Esteirana de remo e o mellor evento deportivo a Trail Cova Da Bruxa.
O premio especial da veciñanza foi para Adrián Fernández Lago (grappling/Jiu Jitsu) e o recoñecemento especial do Concello de Muros para Adelino
Fernández Tajes. Houbo tamén tres mencións especiais para José Mayo Caamaño, Carmen Caamaño Caamaño e Recesvinto Tajes Sendón.
—“O deporte muradán é envexa en toda a comarca”, asegurou a alcaldesa de Muros, María Lago
—O mellor club deportivo é a SCRD Esteirana e o mellor evento deportivo o Trail Cova Da Bruxa
—-Adrián Fernández Lago, José Mayo Caamaño, Carmen Caamaño Caamaño, Recesvinto Tajes Sendón e Adelino Fernández Tajes recibiron recoñecementos e mencións especiais
