Miguel Santalices pide a intercesión do Apóstolo Santiago polos máis vulnerables na tradicional ofrenda de Translacióne o arcebispo pide “alzar a voz sen medo” polos que sofren.
O presidente do Parlamento de Galicia, Miguel Santalices, exerceu este luns como delegado rexio na tradicional ofrenda de Translación dos restos do Apóstolo Santiago. Durante o acto, celebrado na Catedral compostelá, Santalices pronunciou unha extensa intervención en galego e castelán, na que solicitou a intercesión do patrón de España polos que sofren violencia, as vítimas das guerras, os desfavorecidos e os damnificados pola DINA, ademais de subliñar o “deber moral” dos gobernantes de garantir a igualdade cidadá e establecer un sistema de financiamento “que priorice as persoas por riba dos territorios”.
Na súa intervención, Santalices destacou a traxedia provocada pola DINA, “unha catástrofe natural que deixou vidas afogadas e fogares arrasados”, e expresou o seu agradecemento aos voluntarios e membros de emerxencias que acudiron a auxiliar ás vítimas. Ademais, lamentou o impacto das guerras no mundo, como as de Ucraína e Oriente Medio, subliñando que “a paz convértese, por desgraza, nunha utopía”. Tamén pediu a erradicación da violencia de xénero, cualificándoa de “repugnante e devastadora”, e pediu paz nos fogares e nas familias.
O presidente tamén rogou saúde para os enfermos, apoio para a emigración galega e intercesión para o papa Francisco, o rei Felipe VI e o ben común. Santalices fixo fincapé na necesidade de poñer ás persoas no centro das políticas públicas e de traballar pola xustiza e igualdade social.
O arcebispo pide “alzar a voz sen medo” polos que sofren
Durante a homilía do acto, o arcebispo de Santiago, Francisco José Prieto, instou os fieis a “alzar a voz sen medo en defensa de quen está sufrindo”. En especial, destacou a urxencia de acoller e integrar a migrantes e refuxiados, criticando o seu uso como “arma política”. Lembrou tamén aos damnificados pola DINA e alertou sobre problemas sociais como as adiccións, a falta de vivenda digna e as consecuencias das guerras.
Monseñor Prieto concluíu pedindo a intercesión do Apóstolo para erradicar a violencia contra nenos e mulleres, así como para avanzar cara á paz e a xustiza en todo o mundo.
