O Teatro-Cine Elma será o escenario, este 14 de decembro, da función dun espectáculo de danza que fusiona o baile tradicional galego coa disciplina contemporánea con dúas bailadoras sobre as táboas e acompañamento de percusión. Et Suseia Danza presenta O que non se ve, unha nova peza que dá continuidade a un proxecto nacido a finais de 2021 coa idea de crear sinerxías entre dous mundos das artes escénicas, o tradicional e o moderno. O resultado son obras como esta que se estreou no marco da programación cultural do Concello de Santiago e que pretende mostrar “o que existe máis alá das vestimentas, representando a través desta danza híbrida e perfectamente conxugada a forza e a loita da muller na sociedade actual”, sinalan dende a agrupación, engadindo que a nivel musical, a peza aporta unha nova sonoridade nas melodías mergullándose na percusión tradicional pero enfocándoa cara un aspecto máis actual. Tamén mudan as letras facendo letras propias, amosando o poder da muller do rural galego como clave da conservación da tradición oral. As coreografías son orixinais de Et Suseia, creadas por Erick Pegueros, Diego Landín e Gustavo Couto e interpretadas por Iria Portos e Iria Calvar, como bailadoras titulares, con Cristina Cotilla na percusión.
Ademais diso, Et Suseia Danza pecha a súa xira de inverno enmarcada no Outono das Artes da Deputación da Coruña, coa que percorreron gran parte dos teatros e auditorios da provincia. A compañía
Et Suseia Danza adoptou o nome dun saúdo de ánimo entre peregrinos e peregrinas que significa “imos alá” ou “máis alá”. A expresión representa a esencia da compañía, que pretende ir máis alá no mundo da danza mesturando tradición con modernidade. Desa necesidade de expresión unindo dous estilos fundouse a finais do 2021 Et Suseia, xurdida da colaboración entre OCT Ultreia (Santiago) e o Ballet de Galicia (Marín). En pouco tempo buscou crear un espazo propio dentro da danza en Galicia realizando diferentes actuacións e acadando varios recoñecementos: 1º Premio no Certame Coreográfico organizado pola ASPG (2021); 3º Premio da categoría Fusión no concurso Vigo Porté (2021) finalistas do concurso Interritmos – Son do Rural, organizado pola Asociación DELOA (2021) e premio do público como mellor peza de danza no circuíto Compostela Cultura 2023.
