A Concellaría da Cultura da Pobra do Caramiñal organiza dous espectáculos de danza na localidade con motivo do Nadal 2024. “As artes escénicas son a pedra angular da axenda cultural da Pobra do Caramiñal nestas datas tan significativas con tanta vitalidade no noso municipio. O público poderá desfrutar de dous espectáculos de prestixio, recoñecidos con numerosas distincións, onde se unen folclore e vangarda”, explicou en rolda de prensa, este 9 de decembro pola mañá a concelleira da Cultura, Patricia Lojo.
Segundo explicou, a agrupación Et Suseia Danza será a primeira compañía en pasar polo Teatro Cine Elma con O que non se ve; unha obra que recala na localidade coa colaboración da Deputación da Coruña. Será no 14 de decembro, ás 20.30 horas. Representarán a través do movemento a forza e a loita da muller na sociedade actual. Pon no punto de mira diferentes micro machismos que hai no día a día. Aquí mestúranse danza tradicional e contemporánea; unha combinación que tamén transcende á melodía. Coreografías creadas dende a contemporaneidade da danza e mesturadas co son da música tradicional oral, onde se identifica a enerxía das mulleres do rural galego.
E, se Fran Sieira impartiu nos pasados días o obradoiro Danza galega, tradición e vangarda, agora o público terá ocasión de desfrutar de Coreografías dun DeMente no 27 de decembro, ás 20.30 horas. Trátase dunha obra de baile e música tradicional que aborda o estigma das patoloxías vinculadas á saúde mental. En escena, a coreografía amosa a evolución histórica que sufriron, e sofren, as persoas con problemas de saúde mental: dende a reclusión ata as contencións químicas. A peza ten unha duración de 45 minutos que concentra a esencia dos movementos de DeMente.
O acceso é libre ata completar a cabida.
