O auditorio do Centro Cultural e Xuvenil de Muros acolle este sábado 28 de decembro ás 18.00 horas unha función de teatro para a rapazada: o espectáculo Rato Pérez (especial Nadal) de A Xanela do Maxín. A entrada é de balde e as reservas pódense facer a través da Rede, ou tamén de xeito presencial nas oficinas do Centro Cultural e Xuvenil de Muros, en horario de 8 a 15.00 horas. Trátase dunha peza recomendada para nenas e nenos maiores de dous anos.
Nesta función, o célebre Rato Pérez enfróntase a perigos e desafíos nunha misión trepidante para resolver o seu problema de almacenaxe de dentes, sen esquecer a importancia de manter viva esta tradición. Trátase en palabras da compañía A Xanela do Maxín “dunha comedia chea de acción que nos achega ao fascinante mundo dos seres recolledentes e á importancia de coidar os sorrisos das nenas e nenos”.
