Proseguen en Dodro as actividades culturais e de lecer relacionadas co Nadal. Este 3 de xaneiro celebrarase unha das iniciativas máis destacadas das que organizou o Concello nestas datas sinaladas poñendo o foco na rapazada: unha visita ao Belén de Valga para as cativas e os cativos. A saída está prevista para as 9:45 horas e está programado que regresen ás 13:00.
Trátase dunha actividade para nenos e nenas de 3 a 12 anos. A inscrición está aberta ata o día 2 no rexistro do concello. Unha visita que forma parte do programa Corresponsables e na que colabora a Xunta de Galicia e o Ministerio de Igualdade.
O Belén de Valga, para quen non o saiba, está considerado Ben de Interese Turístico e Cultural e inclúe a cifra nada desprezábel de 4.500 pezas. Ademais, atesoura xa no seu rexistro a visita de 40.000 persoas. Trátase dun dos nacementos máis grandes de toda España.
