A área de igualdade da Deputación fixo entrega dos galardóns aos 8 gañadores do VI Premio Luísa Villalta a proxectos pola igualdade. As propostas seleccionadas, de múltiples disciplinas artísticas que van das artes escénicas ao cinema, a historiografía, a promoción da lectura ou a fotografía, recibiron un importe de 12.500 euros para o seu desenvolvemento.
Durante o acto deste 17 de decembro, obtiveron ademais como recoñecemento unha fotografía de Xurxo Gómez Chao, “unha peza que se titula Isto, que é un verso dun poema de Luísa Villalta, creada no 2017 para os actos de homenaxe a Luísa organizados pola asociación Alexandre Bóveda”, explicou o autor. “Fala do reverso das rúas, das habitacións e das casas, da cidade esquecida e instantes, presenzas, da vida e da morte, da música, da identidade e do achado”, engadiu.
A deputada de Outes, Soledad Agra, presentou as entidades e persoas gañadoras e agradeceu ao xurado, formado polo sociólogo Adrián Gonçalves e a profesora universitaria Ana Belén García Freijeiro, “o difícil traballo de selección”. Agra explicou o obxectivo desta iniciativa: “Como Luísa Villalta, nós queremos ir formando parte do compromiso social coa consecución dunha sociedade máis xusta, libre, igualitaria e democrática, por iso apoiamos proxectos de sensibilización, transformación e divulgación que poñen en valor o papel histórico, económico, social e cultural das mulleres.”
Proxectos premiados
As persoas responsables das iniciativas premiadas explicaron os seus traballos e agradeceron á Deputación o recoñecemento e o traballo a prol da igualdade.
O próximo baile, será comigo, de Sabela Losada Cortizas; Ofuscadas polo vicio da razón, de Yarama África; Non calarás, da Asociación Cultural Alexandre Bóveda; Altas luces, de Illa Bufarda; ‘A historia vaxenial, de Artyc Content; Punto en boca. Costura e teatro, de Raquel García Crespo; As mulleres no xornalismo Galego: a crónica revelada, do Colexio Profesional de Xornalistas de Galicia; e A clase, de Mala Herba Producións son os proxectos premiados en 2024, cuxos responsábeis recolleron este 17 de decembro o galardón da man da deputada de igualdade, Soledad Agra.
