A maioría das Administracións Públicas están a poñerse as pilas para facer realidade o artigo 47 da Constitución Española e demais convenios internacionais. Nunca é tarde cando hai vontade de que todos os españois poidan gozar dunha vivenda digna, ben sexa en propiedade ou en alugueiro, sexa penalizada a especulación e entendida a vivenda como un Dereito e non como un negocio. Xa se avanzou en varios Dereitos Fundamentais como a Sanidade, a Educación, a Dependencia…, agora chegará o momento para a Vivenda.
A Xunta de Galicia, a través da Dirección Xeral do Instituto Galego de Vivenda e Solo (IGVS), está a negociar coa Sareb a cesión gratuíta das decenas de vivendas públicas que hai en Galicia ao obxecto de poder destinalas a alugueiros sociais así como para que, cada Concello, poida dispoñer de inmobles para facilitar a alternativa habitacional para familias vulnerables en caso de desafiuzamento xudicial. Ademais, a Xunta de Galicia, desexaría que a Sociedade de Xestión puidese prorrogar a súa disolución e así poder alongar o prazo para ter e marxe suficiente de sopesar a compra desas vivendas, por parte do Goberno autonómico.
Pola súa banda a Sareb, que desaparecerá no ano 2027, quere efectuar as cesións das vivendas públicas no seu poder, a condición de que exista un compromiso de opción de compra, por parte da Xunta de Galicia, unha vez se disolva Sociedade de xestión de activos procedentes da reestruturación bancaria. Hai que ter en conta de que, actualmente, o Estado, a través do FROB, posúe máis do 50% do capital da Sareb.
