Finalmente e coa axuda do clima, as persoas participantes, o público e por suposto a organización, a décima edición da Carreira Popular Concello de Rianxo foi un novo éxito deportivo do municipio rianxeiro e do Barbanza. Segundo confirmou o Concello, que compartiu nas redes unhas cantas imaxes de impacto da proba, a carreira congregou este 1 de novembro a máis de 770 participantes de todas as idades.
Hugo García, do Atletismo Portugalete, e Soledad Leiro, do Club Atletismo Compostela, impuxéronse na proba absoluta. Os rianxeiros máis rápidos foron Alejadro Creo, do Triatlon Rianxo, e Aldara Betanzos, da S.D. Barbantia Roda.
As clasificacións pódense consultar polo miúdo na web Emesports.
Esta proba, organizada polo Concello e máis o Club Atletismo Rianxo, forma parte dos seguintes circuítos:
-X Circuíto Provincial de Carreiras Populares, promovido pola Deputación da Coruña.
-VII Circuíto Carreiras Populares Barbanza Arousa, promovido e organizado polos Concellos que forman parte da Mancomunidade Arousa Norte: Boiro, Rianxo, A Pobra do Caramiñal e Ribeira.
Establecéronse tres categorías: absoluta, escolares e sapatilla inclusiva.
