Altri, a multinacional lusa, non renuncia ao seu proxecto de macrocelulosa na Ulloa, malia que o estudo de impacto ambiental carece dos requisitos mínimos para a súa aceptación e que iría en senso contrario ao que preconiza nos seus obxectivos 20-30 a Unión Europea.
Porque Altri non é unha fábrica de teas, é unha macrocelulosa que pretende a elaboración de 400.000 toneladas de celulosa soluble e 200.000 de lyocell a partir dunha masiva prantación de eucalipto cuxa repercusión será máis directa na comarca da Ulloa integrada polos concellos de Antas de Ulla, Monterroso e Palas de Rei e na que, teóricamente, prevalecen os intereses da Reserva da Biosfera Terras do Miño e de espazos protexidos como, entre outros, as fervenzas dos Torrentes do Mácara, en Palas de Rei.
Ulloa Viva, plataforma que cualifica de “desastre ambiental” o proxecto da empresa multinacional portuguesa, chama a atención sobre o importantísimo consumo de auga previsto en Altri, caso de que se lle outorguen os permisos necesarios para o seu funcionamento: 46 millóns de litros diarios a captar no encoro de Portodemouro dos que retornarían ao Altri Ulloa 20 millóns de litros en calidade de vertidos que afectarían á suministración de auga ás familias e agricultores, gandeiros e pequenas empresas da contorna. A auga que consumiría Altri nun día é máis da que precisa toda a provincia de Lugo no mesmo espazo de tempo.
A macrocelulosa ocupará 366 hectáreas nas que existe unha zona de prantas endémicas únicas no mundo que nacen e medran na serra do Careón. A ameaza chega tamén para a fauna nunha zona que fora proposta pola Xunta para se integrar na Rede Natura 2.000 nos anos 2008 e 2011. Por outra banda, Altri dispón dunha vintena de informes favorables para o proxecto industrial, cuestión que resulta, cando menos, chamativa cando se sabe nidiamente o dano que vai causar a sectores da pesca e o marisqueo na Ría de Arousa.
A estes aspectos cómpre engadir a proximidade do Camiño de Santiago, palabras maiores paras os milleiros de peregrinos que o percorren cada ano.
A canalización desde o encoro ata a factoría, de máis de 12 quilómetros, pasa a través de 300 fincas de gandeiros e agricultores aos que se lles impuxo unha servidume de 10 metros de anchura, que converte estas leiras en inservibles para a actividade á que se destinan.
A fábrica de Altri prevé un investimento de 850 millóns de euros, con boa parte de fondos comunitarios. A veciñanza da comarca establece en 500 os postos de traballo directos a crear, mentres que Altri cifra os mesmos en 2.500 en total.
A oposición en Galicia a este proxecto é nomeadamente maioritaria, agás no caso do goberno autonómico. Un aspecto para nada clarexado no por que.
