Ao abeiro do programa cultural FalaRedes da Secretaría Xeral da Lingua, Porto do Son e Rianxo van acoller esta semana cadanseu obradoiro de banda deseñada, dúas actividades creativas nunha xira participativa que está a visitar dúas ducias de concellos da xeografía galega. O de Porto do Son levarase a cabo este xoves 7 de novembro a partir das 18.00 horas na Biblioteca Municipal e o de Rianxo será ao día seguinte, venres 8 de novembro, no Auditorio Municipal a partir das 19.00 horas.
Os obradoiros están dirixidos á nenez, á mocidade ou ao público adulto, e diríxense a achegar a todas as persoas que participen os elementos da linguaxe narrativa visual do cómic. Participarán as seguintes creadoras e creadores:
-Manel Cráneo, quen ademais coordina o proxecto, e que presentará para o público adulto a súa nova novela ilustrada Cinza.
-Inés Vázquez, a recoñecida ilustradora que baseará o obradoiro para público infantil e xuvenil na súa nova obra Aldara.
-Alberto Guitián, quen, como bo humorista gráfico e ilustrador, nos levará ao mundo da creación de personaxes.
-Irene Sanjuán, a ilustradora imparte obradoiros de personaxes dirixidos á infancia e mocidade.
