Os efectivos do GES de Muros xa están na casa logo da súa estadía en Valencia, axudando en labores de recuperación, limpeza e rescate tralos estragos sufridos pola DINA. Durante unha semana, estiveron axudando en Catarroja e Paiporta cos Bombeiros da Coruña e a UME.
Concretamente, os traballos consistiron na inspección e retirada dos vehículos arrastrados pola riada, limpeza e busca de desaparecidos. Tamén realizaron tarefas de control da calidade do aire e achiques de garaxes e ocos de ascensores.
“Desde o Concello de Muros, seguimos pendentes das peticións que nos chegan a través das canles oficiais para ver onde se pode axudar aos municipios máis afectados”, comentou a alcaldesa muradá, María Lago.
A concelleira de Seguridade, Sandra Maneiro, agradece de novo “o traballo do GES e Protección Civil de Muros, ademais de agradecer tamén a Miguel e Rubén polo seu esforzo e por informarme a diario do traballo que realizaban”.
Chegaron a Muros moi cansados pero satisfeitos polo traballo, axudando aos veciños e veciñas de Valencia.
