O alcalde de Boiro, José Ramón Romero, participou na mañá deste 27 de novembro na presentación do partido benéfico que terá lugar o vindeiro 15 de decembro ás 17.00 horas nas instalacións municipais de Vista Alegre en beneficio de Cáritas. Na presentación estiveron tamén o párroco de Boiro, Juan Bermúdez; e o subtenente da Guardia Civil, José Antonio Fernández.
A actividade vai consistir nun partido de fútbol solidario de Clero e Garda Civil: “Unha iniciativa que xa se desenvolveu noutros municipios e que resultou moi proveitosa e que queremos retomar aquí en Boiro nestas datas previas ao Nadal para axudar a aquelas persoas máis vulnerábeis”, afirmou Juan Bermúdez.
“Dende a Garda Civil de Boiro estamos moi contentos de poder participar neste encontro xunto con persoal doutras unidades e poder facer a máxima recadación para unha boa causa”, recoñeceu José Antonio Fernández.
As entradas terán un prezo de 3 euros anticipada e 5 euros na billeteira e todos os beneficio irán destinados a Cáritas. O alcalde de Boiro, José Ramón Romero, animou a toda a veciñanza a colaborar con esta iniciativa “que ten unha finalidade solidaria, que é contribuír á importante labor que Cáritas, en colaboración cos Servizos Sociais e con outras entidades do municipio, realiza para axudar ás familias máis vulnerables nunha época tan significativa como é o Nadal”.
