O Bloque Nacionalista Galego reafirma o seu compromiso coa veciñanza de Aguiño e Ribeira na súa reivindicación para conseguir a cobertura completa das prazas de persoal sanitario nos seus centros de saúde. Dende o BNG criticaron novamente ao PP por ter votado “en contra da iniciativa presentada no Parlamento Galego na que se demandaba a cobertura de todas as prazas vacantes” e aseguran que continuarán apoiando as demandas cidadás e levando as súas reclamacións ao Parlamento para frear o deterioro crónico da sanidade pública. “Non imos parar ata que a veciñanza teña o que lle corresponde: médicos e persoal sanitario suficientes para unha atención digna, sen esperas inxustificables nin consultas improvisadas por falta de profesionais”, afirmou o alcalde Luís Pérez, ao tempo que denunciou que nos centros de saúde de Ribeira e Aguiño faltan nestes momentos catro médicos e outro no Punto de Atención Continuada, situación que obriga ás persoas usuarias a agardar ata tres semanas por unha cita e a recorrer a outros servizos, como o PAC ou as urxencias do Hospital Comarcal da Barbanza, xa sobrecargados.
Dixo tamén que a situación de Aguiño, “onde chegou a non haber ningún médico dispoñíbel”, resulta “especialmente grave”, ao que engadiu que a solución adoptada pola Consellería de Sanidade foi sacar un médico de Ribeira, “algo que só agrava o problema ao trasladar a carencia dunha localidade a outra”.
Os nacionalistas piden á Xunta que tome medidas urxentes para cubrir as vacantes de medicina de familia e pediatría, así como para asegurar unha planificación eficaz que evite este tipo de colapsos no futuro: “Non imos permitir que o Goberno do PP continúe desmantelando a sanidade pública. A veciñanza de Aguiño e Ribeira contará sempre co apoio do BNG na súa loita pola dignidade e os seus dereitos”, concluíu Pérez Barral.
