Esta fin de semana continúa na nosa comarca un dos grandes ciclos culturais da tempada: a primeira Mostra de Teatro de Porto do Son, organizada pola área municipal de Cultura coa colaboración da Deputación da Coruña. A seguinte cita será pois este sábado 9 de novembro, na Casa da Cultura de Porto do Son a partir das 21 horas, onde Malasombra representará a peza Bernarda, dirixida por José Prieto, producida por Xoque Carbajal e protagonizada por Luisa Merelas, Celia González e Paula Pier.
As persoas interesadas en acudir teñen as entradas á venda na oficina da Área de Cultura en horario de luns a venres de 9:00 a 14:00 horas. Ás 21.00 horas pecharanse as portas do auditorio da Casa da Cultura.
Bernarda é un espectáculo baseado no texto orixinal de Jose Prieto, que tamén é director da adaptación teatral. O elenco está integrado por Celia González, Luisa Merelas e Paula Pier.
Bernarda, cualificada pola compañía como “un drama con humor para público adulto” é unha obra de 75 minutos que relata a vida das dúas fillas xemelgas dunha muller chamada Bernarda, que fica viúva o mesmo día en que morre o ditador Franco. Bernarda, ante este panorama de dupla desgraza, decreta o estado de loito.
