A alcaldesa de Muros, María Lago; o concelleiro de Deportes, Damián Torea, e Kiko Lestón Lago, da área municipal de Deportes, presentaron na mañá deste 12 de novembro os detalles da cuarta edición do evento deportivo Nada e Corre. “Será unha mañá de lecer, deporte e hábitos de vida saudábeis para os máis novos e as súas familias”, indicou a alcaldesa, María Lago.
A proba será este sábado, 16 de novembro, a partir das 10.00 horas
A inscrición remata este martes ás 23:59 horas en liña a través da web da Federación Galega de Tríatlon no apartado de competicións.
“Xa hai máis participación confirmada que o ano pasado, con equipos de Santiago, Vedra, Outes ou Noia, polo que desde o Concello de Muros estamos encantados de colaborar”, explicaba Damián Torea, concelleiro de Deportes de Muros.
O Concello asume o custe da licenza dun día dos nenos e nenas non federados.
A proba consistirá en nadar e correr, e a clasificación será baseada na suma dos tempos de ambas disciplinas. Categorías Prebenxamín, Benxamín, Alevín, Infantil e Cadete.
Organizado pola Federación Galega de Tríatlon e o Concello de Muros, coa colaboración da Secretaría Xeral para o Deporte; Protección Civil de Muros; GES Muros; Policía Local e Garda Civil de Muros; persoal de Deportes (técnicos, persoal da piscina…), Serres Runners, e os clubes deportivos de Muros, que aportan voluntarios para que o desenvolvemento da proba sexa mellor.
