Non é produto dun mal soño, senón a realidade dun teimudo empeño que unha empresa mineira quere, si ou si, levar a cabo malia coñecer sobradamente a forte oposición xerada en toda Galicia a un proxecto mineiro que, agora mesmo, ten en contra a milleiros de cidadáns dunha comunidade autónoma que non se deixa enganar polos cantos de sereas que nacen nas entidades bancarias grazas a uns instrumentos deseñados para engaiolar aos que ata vai ben pouco tempo crían nos paxariños preñados.
O proxecto Cobre San Rafael, que así se denomina ese mal soño ou teimudo empeño, máis que proxecto é, xa, unha iniciativa que percura a reapertura da citada mina de Touro. É un paso que tenta ser decisivo polo que a Consellería de Economía e Industria somete a información pública ese proxecto que, de se converter en realidade, afectará aos concellos de Touro, O Pino, Arzúa e Vila de Cruces ao priorizar a recirculación e reciclaxe das augas evitando o consumo externo deste recurso e a súa saída ao exterior (afirma a Sociedade Cobra San Rafael, promotora deste -polo de agora- só proxecto) ao tempo que á pesca e o marisqueo na ría de Arousa.
Como cada quen quece o seu corpo como pode, a compañía incide ao longo dos últimos anos na realización de intervencións de carácter técnico e social, co obxectivo de o converter nunha “iniciativa tractora da reindustrialización verde -cor moi manida polos esnaquizadores da verdadeira Galicia verde- de Galicia e nun referente en minería sostible a nivel europeo” que sexa quen de incidir na realización de intervencións de tipo “técnico e social” ao longo, afirma, dos últimos anos.
Cantan as excelencias do carácter “altamente tecnolóxico” do proxecto deseñado en base á “excelencia e ás melloras técnicas dispoñibles”, da alta capacidade técnica e de compromiso coa sostibilidade que, desde 1990 ata hoxe, “mantén activa a mina de Touro-O Pino na concesión para a produción de áridos”.
Son 30 os días hábiles outorgados pola Xunta para a presentación de alegacións (contados desde o día seguinte á publicación no DOG) en relación ao acordo sobre o proxecto industrial estratéxico (PIE) enmarcado nos municipios anteriormente citados e que incide negativamente no sector marítimo-pesqueiro da ría de Arousa onde a negativa ao devandito proxecto é practicamente absoluta.
