Xa hai nova data para a celebración da IX Andaina Solidaria de CONGALSA que foi aprazada por motivo das condicións meteorolóxicas. Así que, o vindeiro domingo 24 de novembro desenvolverase finalmente esta cita deportiva e solidaria aberta a todo aquel que desexe participar, pasar un bo intre e colaborar cunha boa causa: traballadores de CONGALSA, familiares, amigos, entidades colaboradoras, provedores ou clientes.
Esta cita anual coa solidariedade e o deporte celebrarase de modo presencial con saída á 09.30 h. da Lonxa de Aguiño en Ribeira e, como en anos anteriores, terá unha duración aproximada de dúas horas. A metade de camiño haberá un punto de avituallamento e ao finalizar uns petiscos nos que poder comentar co resto de asistentes como foi o roteiro.
Todas as persoas interesadas en tomar parte nesta iniciativa poden inscribirse a través das webs de CONGALSA e de Deporticket. Para aquelas que queiran participar e non poidan asistir ao evento está a opción de facelo a través do Dorsal 0.
Os requisitos para participar, ademais da achega económica de catro euros, é que cada camiñante deberá entregar polo menos un quilogramo ou un litro de alimentos non perecedoiros. “Con esta andaina queremos dar o noso apoio a aqueles que máis o necesitan, colaborando con iniciativas da comarca do Barbanza que traballen prestando apoio social a colectivos, persoas e familias en risco de exclusión social, como Cáritas e ICE Renovación” tal e como explica Isabel Cañas, directora de Relacións Externas de CONGALSA. “Así mesmo, agradecemos ao Concello de Ribeira e á Asociación de Amigos do Camiño de Santiago do Barbanza A Orixe a súa colaboración na organización desta nova edición da andaina”, engadiu Cañas.
A xornada solidaria non só será un evento para contribuír a causas benéficas, senón tamén unha oportunidade para gozar dunha contorna natural única en Ribeira. O percorrido de 10 quilómetros, deseñado para ser accesíbel a persoas de todas as idades, convida a compartir unha experiencia na que deporte e solidariedade fusiónanse.
Así mesmo, as primeiras 300 persoas que se inscriban recibirán unha camiseta conmemorativa da andaina que levarán o deseño gañador do Concurso de Deseño que se organizou entre os traballadores de CONGALSA e os seus familiares.
A empresa anima a todos os participantes a gozar do evento, non só polo seu impacto solidario, senón tamén pola posibilidade de pasar tempo de calidade con compañeiros, amigos e familiares, promovendo un estilo de vida saudábel.
