É unha pura tolemia: cando Portugal ardía vai uns días a causa dos incendios ao parecer provocados por non se sabe quen e por que, chegando as lapas a prender en montes galegos fronteirizos cos lusos, as críticas á megaindustria Altri prevista na Ulloa salientan o feito de que no proxecto coñecido a Xunta de Galicia xogue un papel determinante xunto coa multinacional portuguesa e a entidade Abanca, herdeira de Caixa Galicia nunha operación aínda hoxe non de todo entendida.
Altri e Portugal, de ir avante este proxecto a tres bandas que consumiría diariamente a auga que precisa actualmente toda a poboación que habita a provincia de Lugo, serían, xunto con Abanca, os grandes beneficiarios da instalación en territorio galego dunha macrocelulosa que emporcaría o medio ambiente, afectaría negativamente ao río Ulla e a súa comarca, ao camiño de Santiago e, sen dúbida, á Ría de Arousa, na que desemboca o antedito río. Tal industria de celulosa implicaría, para a súa explotación en Galicia, a masiva plantación desde inimigo declarado dos montes galegos -que tampouco queren os portugueses- e que son os eucaliptos, grandes consumidores de auga, potencialmente doados elementos incendiarios cuxos refugallos van parar á ría arousá con innegable prexuízo para os milleiros de mariscadores que viven da extracción de bivalvos nos areais desta ría.
Que gaña a Xunta con ese apoio nunca descafeinado a Altri, que rendas políticas ou económicas prevé extraer o goberno de Galicia desa operación que, maioritariamente, rexeitan os galegos fartos de promesas incumpridas e de cansinas actuacións inexplicables por parte dos que, tendo nas súas mans a rendas do poder, fan ostentación deste sen nin sequera dar oportunidade aos que protestan de facer sinais de que atenden e entenden as súas razóns?
Os que a vai anos peiteamos canas ou nin temos pelo que peitear, sabemos de que vai a celulosa. A ría de Pontevedra é unha mostra nada edificante. A celulosa alí radicada deixa acotío e dende os anos 60 do século pasado a súa pegada. Sabemos, polo tanto, de que falan os que se queixan e opoñen a Altri: están escarmentados. A diferencia é que, cando aquela industria se instalou, España era unha ditadura que ninguén -coido- acepta hoxendía, non?.
