Dende a Concellería de Servizos Municipais de Ribeira informan á veciñanza que se están a levar a cabo os labores de reposición dos contedores de lixo que se atopaban en mal estado, moitos dos cales, segundo explicou o dito departamento do Concello, “xa superan a metade do tempo de uso estimado e están en malas condicións para reparar; polo tanto, vanse mudar por uns novos e os restantes repararanse e limparanse”.
Asemade a concelleira, Tania Redondo asumiu a súa responsabilidade na tardanza neste senso: “Pido desculpas publicamente ante a veciñanza de Ribeira polos inconvenientes xerados e o que levan sufrido dende antes do verán e comprométome a mellorar esta situación”.
Pola outra banda, manifestou que ela e o alcalde, Luís Pérez Barral, mantiveron o pasado setembro unha xuntanza coa empresa adxudicataria do servizo (Urbaser) na cal se lle volveu a trasladar o malestar dos veciños e veciñas. A empresa xustificou certos atrasos no arranxo dos contedores e no seu mantemento “por mor de que a firma contratada para os recambios non lle daba subministrado as pezas novas para os arranxos e recambios”.
Redondo tamén fixo saber que Urbaser contratou a outra empresa de mantemento de recambios que xa está traballando sobre o terreo, xa rematou na parroquia de Olveira e irá reparando por todas as demais parroquias nos vindeiros días e semanas.
