O músico galego Paco Nogueiras estará este sábado 2 de novembro na Casa dos Veciños de Moimenta para ofrecer ao público infantil e familiar o espectáculo Son animal. Será a partir das 17.00 horas e encádrase nas celebracións da edición 2024 do magosto de Moimenta.
O programa do magosto incluirá música, xogos tradicionais para a rapazada, música (DJ Reivax), degustacións de castañas e sobremesas típicas traídas pola veciñanza e máis o devandito espectáculo infantil a cargo do músico multiinstriumentista Paco Nogueiras.
A proposta Son animal é unha homenaxe aos animais cos que convivimos, convertidos en divertidas cancións: hainos grandes, pequenos, con pelo, plumas, cornos, rabo, con catro patas, dúas… ningunha.
O espectáculo inclúe un feixe de cancións que nos levan polo mundo a través de diferentes estilos musicais: dende un aire portugués aos ritmos do leste de Europa, dende unha balada acústica a un animado rock&roll, dende unha marcha circense ate unha melodía de influencias andinas.
