O Concello de Outes anunciou hoxe mércores que levanta as restricións do uso da auga da traída, que dende o martes 15 de Outubro prohibían o seu consumo para uso humano. Segundo indicaron fontes municipais, hoxe mesmo a Consellería de Sanidade enviou os resultados das últimas analíticas realizadas as cales indican que a auga é apta para o consumo. Deste xeito, a veciñanza poderá botar man da auga municipal para tódolos usos, despois de dúas semanas de restricións.
O Concello informou que nestas dúas semanas se realizaron diversas labores de limpeza e desinfección das ETAPS e redes municipais de abastecemento, seguindo as directrices da Consellería de Sanidade, logo de que as analíticas realizadas o 15 de Outubro apuntaran á existencia de contaminación, a cal podería explicar a aparición de numerosos casos de gastroenterite no concello. Aínda que as analíticas realizadas con posterioridade ao 15 de Outubro xa indicaban que auga estaba libre de contaminación microbiolóxica, a Consellería de Sanidade realizou análises adicionais para descartar a presenza de norovirus. Unha vez obtidos os resultados destas análises confírmase que a auga é apta para o consumo.
O alcalde, Manolo González, agradeceu o comportamento exemplar dos veciños e veciñas de Outes diante desta situación así como o traballo desenvolvido polos responsables da Consellería de Sanidade, en particular á Xefa Territorial da Consellería, para solucionar este problema o antes posible. Tamén suliñou o traballo da concelleira de Obras e Servizos, Alba Quintela, nestas dúas semanas. Do mesmo xeito, pediu desculpas á cidadanía polos trastornos creados e anunciou que se tomarán medidas para mellorar a xestión da auga e minimizar así a posibilidade que se poida producir outra situación como esta.
