O Laboratorio Ecosocial do Barbanza convocou unha nova xornada de voluntariado en Rianxo, actuando por primeira vez na área de dúas comunidades de montes veciñais; a do Araño e a de Campelo, O Vilar e Cerqueiras.
Segundo explican dende o Laboratorio, a organización conxunta con dúas comunidades de montes limítrofes “busca sensibilizar aos comuneiros e comuneiras da necesidade de traballar da man, afrontando de forma coordinada os problemas que lles son comúns, como a propagación de especies invasoras e os riscos de lumes forestais”.
Por outra banda, esta nova convocatoria chega unha vez superado o ecuador das actividades de voluntariado planificadas no marco do Laboratorio, unha ocasión para celebrar que tras 10 xornadas xa se superaron aos 350 voluntarios e voluntarias.
Esta undécima xornada celebrarase na mañá do sábado 10 de agosto e centrará o seu traballo na eliminación de acacia en ambos os dous montes veciñais. Está aberta á participación de todos os públicos e dará comezo ás 9:30 da mañá desde o acceso ao Miradoiro da Moura. É necesaria inscrición para participar, que deberá realizarse enviando un correo a info@montescola.org ata o
xoves 10 de outubro inclusive.
Ao rematar os traballos ofrecerase xantar de albaroque ás persoas participantes. Coordinada por Montescola (entidade a cargo das actividades de prospectiva comunitaria, voluntariado e educación medioambiental do Laboratorio Ecosocial do Barbanza), esta xornada conta tamén coa colaboración das Comunidades de Montes Veciñais en Man Común do Araño e a de Campelo, O Vilar e Cerqueiras.
Apoio
O Laboratorio Ecosocial do Barbanza conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
