Dende hoxe, a cidadanía galega ten un mes para presentar suxerencias e ideas que contribúan á organización do Foro do Litoral de Galicia.
O Foro vai constituirse coma o máximo ente de participación, consulta e asesoramento en materia de ordenación da costa da comunidade autónoma. O decreto que regulará a composición e funcionamento interno do devandito Foro vai ser sometido a exposición pública pola Xunta desde hoxe mesmo, cadrando no tempo -non no día- coa celebración dos primeiros 20 anos de vida da Federación Galega de Confrarías de Pescadores.
A constitución do Foro do Litoral , contemplada na Lei de Ordenación e Xestión Integrada do Litoral de Galicia (Loxilga) foi aprobada en xullo do ano pasado e paralizado o seu desenvolvemento durante meses por mor dun recurso presentado polo Goberno central.
Unha vez recibido o aval do Tribunal Constitucional (sentenza do pasado mes de abril) o obxectivo do goberno vai na percura de empregar todos os instrumentos que favorezan a xestión da costa galega canto antes.
Este novo espazo participativo tentará integrar á Administración autonômica, ás tres universidades galegas, organizacións dos principais sectores produtivos, organismos científicos e grupos adicados á defensa do patrimonio cultural. Unha integración longamente acariñada a outros efectos e que só en determinadas circunstancias se fixo realidade.
Os membros deste Foro deberán garantir o cumprimento dos principios de xestión integrada da costa, asegurando amáis a participación activa e efectiva dos sectores socioeconómicos nas estratexias e proxectos relacionados coa ordenación costeira.
O pasado 9 de outubro ficou constituida a Comisión Interdepartamental de Coordinación do Litoral, encargada de dar pulo ao Foro e elaborar as directrices de ordenación do litoral, e será o marco de referencia para futuros instrumentos, segundo as previsións da Xunta.
