O Concello e os grupos da Corporación de Ribeira gardaron un minuto de silencio polas vítimas da dana que asola boa parte do España, cebándose especialmente na Comunidade Valenciana.
O Concello púxose a disposición das autoridades polo que puidesen precisar. “Nestes momentos de dor e consternación, expresamos a nosa solidariedade e apoio a todas as persoas afectadas pola recente dana que golpeou con forza especialmente a Comunidade Valenciana, deixando un saldo tráxico de persoas falecidas e desaparecidas”, sinalou o equipo do Concello, engadindo que dende Ribeira “queremos enviar o noso máis sincero pésame ás familias e amizades que perderon aos seus seres queridos, e estendemos o agarimo e esperanza a quen aínda esperan noticias sobre o paradoiro dos seus familiares”.
“Queremos que a Comunidade Valenciana saiba que, nestes momentos tan duros, conta coa solidariedade e o apoio de todos e todas nós”, expresou o rexedor Luís Pérez Barral en nome da Corporación local e da veciñanza, engadindo que “desexamos que poidan superar este difícil episodio e reconstruír o perdido coa forza da unidade e a esperanza”.
