O alcalde de Boiro, José Ramón Romero, e o concelleiro de Urbanismo e Obras, Luis Ruiz, visitaron na mañá deste 17 de outubro o Polígono Industrial de Espiñeira para coñecer o desenvolvemento das obras de mellora da infraestrutura viaria e instalación de cámaras de seguridade que se están a levar a cabo no complexo industrial.
Os traballos buscan dar completar ás melloras dunha vía dunha lonxitude de 680 metros comezadas no ano 2023. Proxéctase a posta a punto da vía coa realización dun treito de beirarrúa e a pavimentación das beirarrúas existentes, que na actualidade están sen pavimentar, facendo que estas sexan máis estreitas e menos seguras para as persoas usuarias do polígono.
“Estanse revisando tamén os servizos para que as actuacións redunden na mellora da actividade empresarial e que chamen a que máis empresas conten con Boiro para comezar aquí a súa actividade empresarial”, afirmou Luis Ruiz.
Para a mellora da seguridade estase facendo tamén a instalación de cámaras de vixilancia que cubran todas as factorías do parque empresarial. “Con esta actuación imos a seguir mellorando a seguridade das empresas do Polígono co obxectivo de previr o roubo, vandalismo ou danos nas propiedades, algo no que estamos a traballar dende o ano 2019”, afirmou o alcalde, quen sinalou que “aínda que xa se conta cun sistema de seguridade e vixilancia, o que se pretende é a substitución de aquelas cámaras máis antigas e a instalación de novas en zonas determinadas de acceso ou aparcamentos públicos”.
Para levar a cabo estas actuacións o Concello de Boiro recibiu unha subvención da Consellería de Economía, Industria e Innovación da Xunta de Galicia por importe de 105.919,79 euros.
O Parque de Espiñeira comezou a súa andaina no ano 1998 e na actualidade conta cunha superficie de máis de 300.000 metros cadrados, co terreo industrial completamente esgotado e máis do 80% das parcelas xa ocupadas.
Nos últimos anos instaláronse no Polígono de Espiñeira grandes factorías polo que a afluencia diaria de persoas é cada vez maior. Isto, sumado ao tempo transcorrido, fai que as infraestruturas viarias precisen de melloras e tamén de aumentar as medidas de vixilancia para garantir a seguridade das empresas fronte aos posíbeis casos de vandalismo.
