Hoxe na Biblioteca Municipal de Ribeira, a artista e fotógrafa Maribel Longueira asinou un exemplar da obra “Papagaio” que conta coas súas fotografías e poemas de Luisa Villalta e que fora editada por Laiovento en 2006 que existía na Biblioteca Municipal, xunto ao bibliotecario Xan Callón, pero tamén doou un par de obras; trátase da nova edición recente de “Papagaio” deste ano 2024 e de “Alguén agarda que volva alí”, un libro de 20 fotografías de Cuba realizadas por Maribel e acompañadas doutros tantos textos de escritores galegos entre os que se atopan Mendez Ferrín, Yolanda Castaño, Fdez. Naval, Chus Pato ou Lino Braxe.
Ata o vindeiro 29 de novembro, na sala de exposicións do CC Lustres Rivas poderase visitar gratuitamente a mostra fotográfica “Xente do Medio” realizada por esta artista que nos está acompañando estes días no marco do Festival Intenacional de Cinema Documental Mares da Fin do Mundo que por primeira vez ten lugar en Ribeira e foi inaugurado onte polo alcalde Luis Pérez Barral e Marcos Gallego xunto a outras autoridades da Deputación, Xunta, Concello e o tecido social do municipio e da contorna.
