Este mes de outubro colle impulso definitivo a Mesa Local de Coordinación Interinstitucional Contra a Violencia de Xénero de Porto do Son, que nace para canalizar os esforzos e recursos das entidades locais (públicas, sociais, sanitarias, docentes, policiais, etc) de cara á prevención e loita contra as agresións machista en calquera das súas manifestacións.
“A súa natureza insterinstitucional facilitará o desenvolvemento de dinámicas cooperativas e o establecemento de redes de colaboración entre as diferentes institucións e colectivos sociais que interveñen no territorio”, sinala o Concello de Porto a respecto dos obxectivos que se buscan con este tipo de iniciativas, engadindo que este mércores 23 de outubro e máis o día 30 do mesmo mes desenvolverase o programa de actividades formativas que dará impulso á Mesa Local.
En concreto, o obxectivo da formación é o “de facilitar claves para o traballo grupal e a dinamización e participación dos axentes que forman parte das Mesas Locais, a través da mellora das capacidades para a organización e a dinamización de procesos de traballo e de toma de decisións”.
Estes son os retos marcados nas sesións formativas:
-Mellorar a eficiencia do conxunto de espazos de toma de decisión, asembleas e reunións nos que se organizan as mesas locais de coordinación.
-Identificar e pór en valor as lóxicas de traballo, así como os elementos ou obstáculos que facilitan/ dificultan a operatividade das mesas locais.
-Identificar axentes e entidades do territorio para a procura de alianzas sobre as que deseñar estratexias de prevención e loita contra a violencia de xénero.
-Mellorar a coordinación e a participación activa das persoas que forman parte da Mesa Local
-Identificar as condicións e habilidades facilitadoras para asentar a Mesa Local de coordinación como espazo de referencia na colaboración para unha atención integral ás mulleres da contorna.
-Coñecer as competencias e habilidades persoais para un liderado democrático e transformador: comunicación, escoita activa, empatía, dinamización de grupos, mediación, moderación de reunións, resolución de conflitos…
