A Asociación Ambar das Persoas con Diversidade Funcional mobilizouse este martes 22 en Ribeira, na Estación de Autobuses, para reclamar transporte público accesíbel para toda a cidadanía, no marco das reivindicacións levadas a cabo en toda Galicia (coordinadas pola confederación COGAMI) e en toda España (COCEMFE).
Na concentración en Santa Uxía, a xeito de reivindicación teatral, representouse a espera da que sería a primeira persoa teletransportada dende Madrid. Finalmente o teletransportador da Confederación Española de Personas con Discapacidad Física e Orgánica (COCEMFE) e o seu Movemento Asociativo non funcionou, mais foi o protagonista na presentación da campaña: Teletransporte contra a discriminación.
“Se a ciencia por fin tivera conseguido deseñar e construír un teletransportador sería a nova do século, sobre todo, para as persoas con diversidade física e orgánica. Por desgraza aínda estamos moi lonxe de conseguir tal avance e teremos que facer uso dos medios de transporte que de momento temos ao noso alcance”, explicaron dende Ambar, engadindo que con esta campaña a asociación do Barbanza e o Movemento Asociativo de COCEMFE queren denunciar a falta de accesibilidade nos medios de transporte e esixir que se cumpran as leis de accesibilidade de maneira simultánea nun total de 28 cidades do país.
No acto participou Cruz Rivadulla, concelleira de Diversidade de Ribeira; Sheila Santos, técnica de accesibilidade; Lydia Parga, terapeuta ocupacional e persoas usuarias da Asociación Ambar. Para rematar a acción, Tony Estévez e Vanessa Villar, persoas usuarias de Ambar, fixeron lectura dun manifesto: “…Como a día de hoxe, non podemos teletransportarnos, ata que o teletransporte sexa viábel como na serie Star Trek, queremos que os nosos transportes urbanos e interurbanos cumpran coas leis de accesibilidade e deixen de ser discriminatorios. A través desta campaña, esiximos que se nos garanta a accesibilidade universal en infraestruturas e vehículos. Aquí queremos incluír a dispoñibilidade de puntos de recarga e subministro eléctrico para dispositivos médicos esenciais como os equipos de oxíxeno líquido, fundamentais para persoas con discapacidade orgánica que requiren apoio respiratorio. …”
Esta campaña está financiada a través das subvencións para a realización de actividades de interese xeral consideradas de interese social da convocatoria do 0,7 do Ministerio de Dereitos Sociais, Consumo e Axenda 2030.
