Comeza un novo curso escolar, nos diferentes campus universitarios. En Galicia, este ano, as matrículas universitarias serán gratuítas. Tamén xa o eran para os estudantes que obtiñan unha bolsa de estudos, principalmente procedentes de familias humildes, de acordo cos seus ingresos económicos, que sería o máis xusto.
O problema real, para a maioría dos estudantes universitarios, continúa sendo o da residencia e Santiago de Compostela é un referente negativo do que non debería ser a especulación inmobiliaria e que tanto prexudica a moitas familias e aos novos estudantes. Recordo, cando algúns estudamos hai xa varias décadas, e vemos como a situación non mellorou e deteriorouse.
Demasiados contratos privados ou de palabra, sen depósitos de fianza, a cambio de rendas importantes e que non se corresponden co bo estado da vivenda. Algunhas con problemas de humidades, falta de luz solar e escasa ou nula ventilación. Arrendamentos por cuartos individuais para que os propietarios obteñan maiores rendementos económicos.
A falta de residencias públicas de estudantes foi, desde sempre, unha dificultade para algúns estudantes que tiveron que optar polos estudos a distancia, ao non ser posible a presencial polo excesivo custo dos alugueiros. Aí, é onde a Xunta de Galicia, que ademais é a súa competencia en materia de vivenda, tería que adoptar medidas pero nunca lles interesou para beneficiar a uns cuantos propietarios, grandes propietarios ou grupos inmobiliarios á conta das familias humildes. Así non se pode presumir de igualdade de oportunidades nin de ter liberdade para elixir.
