Para a maior parte da veciñanza de Boiro, a pretensión dun pequeno grupo de habitantes de Escarabote-Lampón (terra de boas cereixas en tempos) de mudar a decisión da corporación municipal de dar -pleno do 27 de abril de 2023- o nome do Padre Joseba ao treito de estrada coñecido como Carretera do Muelle (carecía dunha denominación oficial) non é outra cousa que “saír nos papeis” e “xa o acadaron”: menos de medio cento de residentes, en uso dos seus dereitos de manifestación, concentráronse o sábado pancarta en man de media ducia deles para esixir do Concello o troco do nome aprobado na devandita sesión municipal, que recoñecía o labor levado a cabo por Joseba Beobide, sacerdote do Stella Maris, durante o seu periplo de anos en Terranova e en contacto permanente coas tripulacións dos bacalloeiros galegos e vascos que faenaban naquelas augas canadenses.
Entres estes tripulantes, bo número de boirenses de Escarabote e outras parroquias do concello.
A petición, formulada pola Asociación Española de Titulados Náutico-Pesquera (AETINAPE), que se facía eco da dirixida a esta por, entre outros, mariñeiros do municipio de Boiro, foi aceptada sen discusión polos integrantes do equipo de Goberno que a levou ao pleno e este, como está previsto, tomou unha decisión que agora unha mínima representación da veciñanza de Boiro tenta modificar no senso de que se retome a antiga denominación de Carretera do Muelle sen máis motivo que o xustifique que era o nome anteriormente empregado (cando en realidade era un nome consecuencia da falta do mesmo).
O chamado feito por este mínimo grupo á participación dos veciños na concentración-manifestación anunciada para as 12,00 do pasado sábado, non obtivo máis resposta que a dunha vintena de persoas, que se concentraron portando unha pancarta reivindicativa mas inmediacións do varadoiro de Escarabote.
