Renatur_Outes, proxecto de recuperación ambiental do río Tins en Outes, programou dúas novas accións de voluntariado ambiental para a segunda quincena de setembro, centrándose desta volta no Parque Vista Alegre, punto no que o río desemboca na ría de Noia formando o esteiro do Tins, xa en Rede Natura 2000. As convocatorias, marcadas para o sábado 21 e domingo 29 deste mes en horario de mañá, está abertas a todos os públicos. Para participar apenas é necesario enviar un correo electrónico a info@montescola.org ata o día previo a cada actuación.
Dende Renatur_Outes, indican que as accións teñen “o dobre obxectivo de eliminar as especies exóticas invasoras presentes neste espazo protexido e continuar coa eliminación de especies exóticas invasoras”. Arrincaranse manualmente exemplares de plantas invasoras como a tradescantia ou a crocosmia e descascaranse os exemplares de eucalipto, acacia e robinia para facilitar que sequen antes da corta e retirada destas árbores. Ademais, a intervención do domingo 29 encádrase na XVII Limpeza Simultánea de Ríos do Proxecto Ríos.
Liderado polo Concello de Outes, Renatur_Outes conta coa participación de investigadores das tres universidades públicas galegas, a Fundación Montescola e o CEER (Centro de Estudos Eurorrexionais Galicia- Norte de Portugal) e o apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
No eixo do proxecto están a recuperación do bosque de ribeira, o control de especies exóticas invasoras, como as distintas especies de acacia presentes (Acacia dealbata e Acacia melanoxylon), a Tradescantia fluminensis ou as plantas do xénero Crocosmia, a limpeza de residuos da contorna fluvial, e a sensibilización ambiental mediante accións de voluntariado, formativas e divulgativas, fomentando a participación pública da cidadanía de Outes mediante sesións de gobernanza cidadá ao longo de toda a vida do proxecto. Desde xeito non só se pretende alcanzar unha recuperación e mellora da biodiversidade, mais xerar un compromiso social máis alá da propia vida do proxecto.
